Maligayang Pasko!

Maligayang Pasko po sa inyong lahat!

Saan ninyo ginastos ang inyong 13th Month Pay o Christmas bonus? Siguro, ginastos ninyo sa bagong gadgets or damit, no? Ako, iba talaga ang hilig ko. Marami ngang nawi-weirdan sa sagot ko diyan kasi ako, gumastos ako ng medyo malaki para sa aking mga aquariums! Noong December 22 kasi, nahatak ko papuntang Cartimar ang tatay at kapatid ko. Ano ang mga pinamili ko?

Una, bumili ako ng Java moss. Madaling alagaan ang moss na ito. Kahit low lighting conditions, kaya niyang tumubo. Kapag lumago siya, maganda siyang gawing taguan ng mga baby fish. Tamang tama siguro ang timing ko dahil nakikita ko nang nagbebreed ang mga black molly ko.

 

Bumili rin ako ng mga bagong filter. Bumili ako ng hang-on filter para sa 15-gallon aquarium at top filter naman para sa 30-gallon aquarium ko. Pakiramdam ko kasi, di efficient ang mga luma kong filter.

Bumili rin ako ng filter floss, activated carbon, at ceramic filter media para sa top filter ko para mas maganda ang pag-filter nila ng dumi ng aquarium. Yung filter floss, yun yung parang bulak na white. Ginagamit ito para magtrap ng mga maliliit na particles mula sa tubig. Ang activated carbon naman, pang-neutralize ng mga harmful chemicals na nasa tubig. Yung mga ceramic filter media, mukha silang mga Sponge-crunch pero mas maliliit. Pinababahayan sila sa mga good bacteria na mag-aalis din ng mga bad chemicals na maaaring nasa aquarium.

Last but not the least, bumili rin ako ng liquid fertilizer para sa mga aquarium plants ko. Di kasi sila tumutubo ng maayos. Punggok pa rin ang mga dahon ng mga Anubias var. petite ko at di na nagsisibol ang mga bronze Cryptocorynes ko. Sana, bago ko maubos ang bote ng fertilizer, makakita na ako ng results.

Overall all, medyo nagastusan ako sa sarili ko dahil ito ang breakdown:

  P20 - Java moss

  P330 - Hang-on filter

  P350 - Top filter

  P50 - Activated carbon

  P50 - Ceramic filter media

  P10 - Filter floss (x2)

+P200 - liquid fertilizer

_____________________

P1020

Wala pala akong nakuhang pictures kasi na-excite ako at naikabit ko na sa aquariums lahat. Hassle naman tanggalin. Anyway, I hope na yung mga pics sa na galing sa net, nakatulong. Kung may tanong kayo tungkol sa mga bagay na binili ko, comment lang kayo, ha!?!

Malinis na Aquarium

Mga kaibigan, sorry po sa matagal na di pagpo-post dito. Lingid po sa kaalaman ng marami, may dinanas po akong matinding kalungkutan. Naging malala po kasi ang sakit ng aking mahal na nanay, at nitong Oktubre po, siya ay namayapa na. Dahil po doon, halos nakalimutan ko nang bumalik pa para mag-post sa blog na ito.

Ito po ngayon ang lagay ng aquarium ko. Kailangan ko na ring linisin pero hindi sa pagmamayabang, halos 2 months nang di nalilinis yan sa lagay na iyan. 

Buti na lang, kanina, may nag-comment sa isa kong post. Siya po si Wilson, at ito ang kanyang tanong:

Chard.. paano ba mapanatiling malinis ang aquarium? Saka ng tataka ako.. kung bakit namamatay agad ang pet fish q.

Sa post na ito, sasagutin ko po ang unang tanong dahil medyo simple lang ang sagot. Hehehe! Simulan na po natin ang tips para mapanatiling malinis ang aquarium.

Una, bawasan ang pagpapakain. Sa tuwing magpapakain, maglagay lang ng kaunti at bantayan po ninyo ang inyong mga isda. Dapat kasi, pakainin lang sila ng kaya nilang maubos sa loob ng mahigit kumulang 10 minuto. Kapag nasobrahan ang pagkain, nabubulok ito at nagiging sanhi ng malabong tubig na parang nilagyan ng gatas. Nagkakaroon din ng hindi magandang amoy kapag nabulukan ng pagkain ang tubig.

Pangalawa, magpalit ng tubig. Minsan sa isang linggo, palitan ninyo ng tubig ang aquarium kahit 25% lang; mas maganda ngang hindi 100% dahil nagugulo ang mga good bacteria na tumutulong sa pagtunaw ng waste chemicals na nasa tubig. Magkuskos muna ng salamin bago ipasipsip sa hose ang tubig para sumama ang maraming dumi paalis. Subukan din niyo na i-vacuum yung ilalim, lalo na yung namamataan ninyong may mga dumi.

Pangatlo, linisin ang filter. Depende kung gaano kakalat ang mga isda ninyo ang paglilinis ng filter. Kung ayaw ninyo ng hassle, isabay na rin ang paglilinis ng filter sa pagpapalit ng tubig. Mas maiiging yung lumang tubig ang ipangbanlaw sa filter dahil mapapanatili ninyong buhay ang mga good bacteria sa loob nito.

Malabo talaga ang kuha ng camera ng phone ko. Pasensiya na po. 

Sa aking palagay, simple lang ang pagpapanatiling malinis ng aquarium. Ang pinaka malaking bagay talaga sa tips na ito ay yung pagbabawas ng pagkain, pero sa tulong ng pangalawa at pangatlong tips, mas magiging malinis talaga ang aquarium ninyo. Sana po, naging malaking tulong ang post na ito sa mga taong tulad ni Wilson. Huwag po ninyo kalilimutang balitaan ako ha!

Hanggang sa muli!

Paglilinis ng Salamin ng Aquarium

May luma ba kayong aquarium? Kung meron, palagay ko, kaya di niyo na ito pinag-aaksayahan ng panahon ay dahil sa mga puti-puting marka sa salamin dahil sa natuyong tubig.



Ang tawag dito ay hard water stains. Dahil ito sa lime na nasa tubig. Kapag natuyo, naiiwan ito sa salamin tulad ng asin mula sa tubig dagat. Hirap na hirap ako dati tanggalin yan pero hindi na ngayon. Kailangan lang ng suka at kaunting tiyaga.
Narito ang steps:

1. 1. Kumuha ng suka. 
2. Isawsaw ang sponge. 
3. Ikuskos sa salamin. 
4. Hayaan ng mga 5 minutes. 
5. Ulitin kung may natira pang hard water stains.

Mas mainam kung matapang na suka ang gagamitin; ang ginamit ko ay Datu Puti, pero susubukan ko next week ang concentrated na suka.

Depende sa kapal ng lime deposits kung gaano ka effective ang suka, so kailangan lang tiyagain talaga. Kung maaari, pwedeng itagilid ang aquarium para maibabad ang side na maraming lime sa suka at kuskusin lang.
Gumana to sa aking aquarium at sana, gumana rin para sa inyo.

Tapos ang Maliligayang Araw

Naku, tapos na ang maliligayang araw. May pasok na naman sa office. Baka ngayong linggo, sa weekend na ako makapag-post ng bagong article. Sana, sapat naman ang meron dito sa blog para aliwin kayo. O siya, ng maliligo na ako para maka-pasok na sa office. See you soon!

Batong Pwede Gamitin sa Aquarium

Masaya pero nakapapagod ang beach outing namin ng pamilya kanina. Nagpunta kami sa isang parte ng Ternate. Gaya ng lagi kong ginagawa tuwing may pinupuntahang bago, naghahanap ako ng mga bagay na pwedeng gamitin sa pagdedesign ng aquarium. Kadalasan, bato ang tinitingnan ko dahil malaki talaga ang dinadagdag nilang ganda sa aquarium.

Simple lang ang ayos pero maganda, diba? Isa pa, isa ito sa mga akala mo ay murang parte ng aquascaping -- pero hindi! Sobrang mahal ng bato dahil per kilo ito binebenta at mahal na kapag malalaki na ang pinag-uusapan. Halimbawa, 5 kilo sa P50 -- P250 na agad yun! Eh kung mamumulot ka lang, eh di mas mura. Pero hindi lahat ng bato, pwedeng gamitin sa loob ng aquarium. Kailangan, pumasa ito sa acid test para masigurong ligtas ito para sa mga isda.

Ano ang acid test? Tinitest nito kung matutunaw ang bato kung matagal silang ibababad sa tubig. Kapag natunaw, maaari silang maglabas ng chemicals na maaaring lumason sa isda. Buti na lang, madali lang itong gawin. Narito ang mga hakbang:

1. Mamili ng parte ng bato na pwedeng gasgasin.
2. Gumamit ng matigas na bagay para gasgasin ang bato.
3. Patakan ng acid -- pwedeng gumamit ng suka o muriatic acid -- ang bato.
4. Tingnan kung bubula ang parte na pinatakan.

Kapag bumula, ibig sabihin, fail ang bato dahil gawa ito sa material na maaaring tunawin ng natural na acidity ng tubig na pang-aquarium. Kapag hindi naman bumula, pass. Ibig sabihin, pwedeng lubusang linisin ang bato at gamitin sa design ng aquarium. 

Ginawa ko yan kanina. Ito ang picture ng isa sa mga pasadong bato: 

Hindi bumula ang bato kaya ok yan. Ito naman ang isang video ng bagsak na bato:

Kapansin-pansing naging white kaagad ang pinatak kong hydrochloric acid na sangkap ng toilet bowl cleaner namin. Kaya, ayan. Fail siya.

Sa dinami-dami ng inuwi kong bato, tatlo lang ang pumasa. Nakakalungkot -- at nakakapagod sa pagbubuhat -- pero ok na rin yan dahil, at least, hindi naman malalagay sa panganib ang mga isda ko. Huhugasan ko na lang ng matindi ang mga pasadong bato at idi-disinfect ko para pwede ko nang gamitin sa susunod kong bagong layout ng aquarium. 

Pagpaplano ng Bagong Aquarium

Parang ganito yung gusto kong layout.

Gusto ko ng bagong aquarium pero wala pa akong budget. Gusto ko kasing mag-set up ng isang tank na panay Java fern at Anubias lang ang halaman.
Dahil di pa pwede, naisip ko na lang na mag plano. Isa sa pinaka importanteng bagay sa pag-aalaga ng aquarium ang pagpaplano. Bakit? Well, maraming rason.

Una na dito ang pagtitipid ng pera. Maraming pera kasi ang nasasayang kapag hindi ayos ang pagpili ng gamit at isda. Kapag di tugma ang mga bagay-bagay, namamatay kasi ang isda o kaya naman ay kailangang bumili ng ibang gamit.

 Maganda ring may plano kasi nga, madaling namatayan ng isda kapag mali o walang planong nakalatag para sa pag-aalaga. Dapat, tamang pagkain. Dapat, tamang klase ng isda ang pagsasamahin. Kung hindi, patay sa gutom o patay dahil nagkainan ang mga isda. Kawawa naman.

Isa pa, mahirap maglinis ng aquarium kung mali ang paglalagyan. Kapag malayo sa gripo o sa igiban ng tubig, naku, masakit sa braso o likod ang pagpupuno ng tubig. Maganda kung mas malapit sa igiban para madaling magbuhat ng balde; mas maganda kung may hose para diretso na ang paglalagay ng tubig. Siguruhin lang na walang chlorine ang tubig galing sa gripo kasi nakamamatay yun ng isda at halaman. Kung may chlorine, dapat bumili ng chlorine neutralizer.

Mahalaga talaga magplano kapag mag seset-up ng bagong aquarium. Iwas gastos, patay na isda, at sakit ng katawan. Planado na naman ako ngayon. Kailangan ko na nga lang ng pera para pambili. Kailan kaya ako magkaka-extra? Ewan lang, pero sana sa birthday ko sa August, meron na.

BlogIt! Android App

Testing lang ang post na ito dahil nag install ako ng app para makapag blog mula sa phone ko. Gusto ko sanang mag post ng picture pero hindi ko kasi ma-figure out kung papaano ko gagawin dito sa app. Pag nalaman ko na, try ko mag-post ng pics. Kapag di ko ma-figure out, hehehe, ia-uninstall ko na lang to.

Ang Arowana sa Residence Inn, Tagaytay

Noong isang linggo pala, nagpunta kami sa Tagaytay dahil birthday ng tita ko. Sa Residence Inn kami pumunta dahil sa mini zoo nila na hilig ng anak-anakan ko.

Marami na palang nagbago doon, kasama na ang maliit nilang gallery ng mga isda. Sa kasamaan palad, hindi ko gusto ang mga isdang naka-display sa mga aquarium nila dahil common naman ang karamihan. Pero naaliw ako dahil may nai-video akong isang silver arowana.

Ganda, no? Gusto ko sanang mag-alaga din ng arowana. Lumalaki sila ng hanggang apat na piye (feet). Madali lang naman sila sana pakainin dahil kahit na kumakain sila ng isda, kakain din sila ng kahit anong kakasya sa bibig nila. Kapag maliit pa lang, tatlong beses sila dapat pakainin pero pag lumaki na sila ng lubos, kahit isang beses isang araw na lang. Magaling silang tumalon kaya dapat din, may takip ang aquarium. Kung sa mga kasamang isda naman, bawal ang kahit anong kasya sa bibig nila; pwede naman ang ibang isdang lumalaki tulad ng iba't ibang uri ng malalaking cat fish, gar, at dahil mabibilis ang mga pacu, pwede rin naman. Yun nga lang, malaking aquarium nga ang kailangan -- halos 300 gallons kapag mature na ang arowana. Ang ibig sabihin, tipong 8 piye ang haba nun.

Sa may kayang magbigay sa kanila ng ganoong kalaking aquarium, go lang. Mag-alaga lang kayo. Pero kung hindi talaga kaya ang ganoong kalaking aquarium, huwag na lang dahil nakakaawa ang isda. Sa mga taong tulad ko -- yung hindi pwedeng mag-alaga ng ganitong kalaking isda, enjoyin na lang natin ang video na ito! 

Ang Mga Libreng Gourami

Nagtatago sa likod ng aquarium kasi, camera shy.

Noong bata pa ako, wala akong sariling pera kaya naman hindi ako makabili ng mga isdang gusto ko. Nang namatay ang isdang binili sa akin ng Tita ko, ayun, problemadong-problemado ako dahil wala na akong alaga. Hunghang kasi ako noon. Di ko alam kung paano talaga mag-alaga ng isda. Ayun, dedbol tuloy. Mabuti na lang, maabilidad ako noong bata pa ako -- mana sa ama!

Sa tatay ko ako nakakuha ng isang magandang ideya para makapag-alaga ulit ng isda. Nandadala kasi siya (nanghuhuli ng isda gamit ang net). Isa sa mga local na isda na nahuhuli niya ang gourami, at tuwing uuwi siya galing sa ilog, tinitingnan ko kung may mga buhay na gourami sa lalagyan. Kinukuha ko sila at -- voila! -- libreng isda.

Ito naman ang pinaka bibong gourami, nagpapicture!

Kahit dati pa, gandang-ganda na ako sa native na gourami na nahuhuli dito sa amin. Ang nahuhuling gourami dito ay tinatawag na three-spotted gourami. Bakit? Kasi, may tatlong tuldok na itim siya -- isa sa buntot, isa sa katawan, at ang mata naman niya ang ikatlo. Kadalasan, may pagka-silver ang katawan nila at nagkakaroon sila ng mga tulduk-tuldok na orange sa mga palikpik. Minsan, nagkakaroon sila ng blue na kintab at depende sa huwisyo ng guourami, nagkakaroon din ng black stripes na parang zebra.

Sobrang tibay din ng gourami. Dahil nga bata pa ako noon, nakakalimutan ko sila pakainin, pero nabubuhay pa rin sila ng matagal. Di naman kasi sila mapili. Kumakain sila ng halos kahit ano gaya ng lumot, insekto, at maliliit na isda. Ngayon, pinakakain ko sila ng floating pellets dahil mas madaling tanggalin ang sobrang pagkain sa aquarium pag nasobrahan.

Naku, sobrang bilis. Blur lang ang napicturan ko.

Mainam alagaan ang gourami kasi, hindi rin sila maselan sa tubig. Kahit kaunti lang ang oxygen sa tubig, di problema kasi, kayang lumagok ng hangin ng gourami.

Medyo mahirap nga lang haluan ng ibang isda ang aquarium kapag may gourami. Bawal ang sobrang liit na isda kasi, kakainin nila. Bawal din ang sobrang maarteng palikpik kasi gugutay-gutayin lang din nila yun. Pag lumaki, hanggang anim na pulgada minsan, kailangan silang ilipat sa mas maluwag na aquarium,  tipong 30 gallons. Parang fighting fish, nag-aaway din ang mga lalaking gourami, kaya kung alam niyo kung paano malalaman, sana, isa lang sa isang aquarium.

Pwede namang ihalo ang gourami sa mga isdang mabibilis lumangoy. Ngayon, ang kasama ng mga gourami ko ay mga zebra danio, platy, at corydoras. Wala pa namang problema, pero baka magka-baby na ang mga platy. Ayun. Saka ko na lang poproblemahin pag bumukol na ang mga tiyan nila.

Ayaw ko mang ipagyabang pero ang mga pictures na yan ay galing sa sarili kong aquarium. Pasensiya na at malabo dahil di pa digicam ang gamit ko -- cell phone lang. By the way, libre lang din ang mga gourami na yan. Nahuli ng mga bata noong last time na nagbaha dito sa amin. Nakita ko sila sa tabo sa tabi ng tindahan. Sabi ko sa tito ko, kasi siya ang pinagbigyan, "Akin na lang to, To!" Ayan. Libreng isda na naman! Yipee!!!

Tuloy Po Kayo!

Ang Anubias na nasa aquarium ko.

Tuloy po kayo sa aking aquarium blog!

Ako po si Chad at mahilig akong mag-alaga ng mga isda at halamang pang-aquarium. Simula pa noong bata ako, nag-aalaga na ako ng isda. Nagsimula akong mag-alaga ng mga goldfish na nabibili sa tabi ng kalsada at  at sa malaking garapon lang ng Lady's Choice mayonnaise ko sila inalagaan. Di nagtagal, binigyan ako ng ninong ko ng isang malaking aquarium at kung anu-anong isda na ang inalagaan ko. Platy, molly, guppy, gourami, at marami pang iba. Noong high-school ako, nakakita ako ng magazine tungkol sa pag-aalaga ng halamang pang-aquarium, at doon na nagsimula ang aking pagkahilig dito. Marami din akong inalagaang halamang pang-aquarium, pero di pa ako magaling dating mag-alaga kaya namamatay lang sila. Kahit ganoon, hindi pa rin naman ako nasiraan ng loob at tuluy-tuloy pa rin ako sa pag-aalaga.

Ngayong matanda na ako, marami na rin akong natutunan sa pag-aalaga ng isda at halamang pang-aquarium -- trial and error nga lang ang karamihan. Kaya naman ngayon, gusto ko sanang ipamahagi ang alam ko tungkol sa pag-aalaga ng isda sa mga kapwa kong Pinoy na baguhan pa lang para di kayo mamatayan ng isda at masayangan ng pera. Hehehe!

Ito muna sa ngayon. Sana, mag-follow kayo, magtanong (para may mai-post ako), at mag-comment. Hintay-hintay lang po ng kaunti para sa mas maraming kaalamang tungkol sa pag-aalaga ng isda! Salamat!